Mel die Storieverteller is ‘n Afrikaanse komediant en skrywer wat bekendheid verwerf het deur haar komiese TikTok videos en skerp sê-goed. Met vier onderskeidings en twee beurse gaan studeer sy Drama op Stellenbosch. Sy weet toe glad nie wat om met dié graad te maak nie en vlieg Londen toe vir lewenservaring. 

Tussen 2009-2020 leef Mel ‘n klomp lewens in klomp verskillende lande met té veel verskillende haarstyle; van taal en kunste onderwyseres tot projek bestuurder en ghost writer, van British bar lady en gesiggie-verf-tannie tot kostuum uitverhurings en Foreign Teacher Manager.  

Een middag in 2020, onder ‘n akkerboom, na ‘n bottel sjampanje en ‘n koppie vol deurmekaar trane, val daar ‘n wit veer op haar kop en toe is Mel “NOU OF NOOIT!” die Storieverteller gebore.  Sy self- publiseer haar eerste kinderboek in 2020 en maak haar eerste TikTok in Januarie 2021. Sedertdien self- publiseer Mel nog drie kinderboeke en gaan volstoom in die vermaaklikheidsbedryf in.

Drie jaar later het Mel die Storieverteller meer as 330 000 sosiale media volgelinge, miljoene kyke op haar video’s en is op groot aanvraag. Haar video’s is nie net humoristies van aard nie, maar spreek ook belangrike kwessies aan soos vroue bemagtiging en self liefde. Kykers reg oor die wêreld is mal oor Mel se inspirerende en reguit-‘n-ding-sê inhoud. 

In 2023 spring Mel die Storieverteller van die internet af op die verhoog met haar eerste stand-up komedie ‘Almal is Mal!’. Die vertoning verkoop oral uit. In 2024 skop sy die jaar af met ‘n nuwe stand-up ‘Dik Deurmekaar’ wat tans die land vol toer.